O le malae taalo, Mt Smart Stadium ua folafola o le nofoaga autu lea homeground mo le au a le Pasefika mo le Super Rugby le Moana Pasifika ao sauni ai mo lana uluai taamilosaga ile tausaga fou 2022.
O lea nofoaga i Penrose pei ona lausilafia e le toatele sa avea ma nofoaga mautu o le NZ Warriors talu mai le 1995 ina ua faatoa amata foi lea kalapu.
Saunoa le faatamā o le Moana Pasifika, Tuifaasisina Bryan Williams e lagona le agaga maualalo ina ua mafai ona faatino lea tulaga ma sa galulue malosi foi I le taumafaiga o lenei faamoemoe ma le fausia o le brand a le Moana Pasifika I se tasi lenei o tausinioga faapolofesa aupito I finau I le lalolagi atoa.
Fai mai Tuifaasisina e nate iloa e silafia uma e komiuniti a le Pasefika lenei malae ma o supporters poo le au lagolago a le au o le a felanulanuai ai le malae faatasi ai ma le malosi latou te avatua I lea nofoaga ile taimi o taaloga mo alii taaalo pe a tumutumu atu I ni aofaiga toatele mo le tapuaia o faamoemoe o le Moana Pasifika.
O le 2022-2028 lea ua saini ai nei le maliega a le Moana Pasfika ma le Auckland Unlimited mo le avea ai o Mt Smart ma o latou nofoaga autu.
Taua e le faatamā ua 26 tausaga o taumafai mai lenei faamoemoe ma ua nofo sauni mo le uluai taamilosaga ia Fepuali o le tausaga fou.
