O loo faaopoopo pea tagata maliliu e tuuaia ai le umi ona faatali o se fomai i Emergency Departments poo EDs, ma o Ueligitone le falemai lata mai.

Ua fesiligia e le aiga o le 4 tausaga na maliu i le falemai i Ueligitone le lē lava o gaioiga na faia e laveai mai ai le atalii ia Sebby Chua.

O Chua na muamua ave ai i le falemai i Kenepuru i Porirua ona o lona ua sa tiga ma e faapea e lei sa’o ona togafitia.

E lua aso mulimuli ane ua faatetele ma ua tigaina ma o lea na toe sulu ai le aiga Filipino i le ED i le falemai i Ueligitone ma taofia ai loa.

Peitai e fitu itula o nonofo i le potu na o fualaau poo vailaau foi na avane e faatea ai le tiga, seia oo ai ina fiu e faate’i mo le 35 minute ma maliu ai lava.

I suesuega na faia e faapea na maliu ona o le sepsis, e mafua mai i tonsillitis poo aafiaga i le pito i tua o lona faa’ī.

O le tina o le tamaitiiti ua maliu o ia o se fomai tausi soifua, ma o le fesili tele a mātua – o le leai o se faaiuga vave poo le faamuamua sa tatau ona ave i le tulaga tigaina na iai Chua.

O le asō e faimalaga ai le aiga Filipino e momoli lefulefu o le atalii i lona aiga o loo i Filipaina.

E ese mai ai i le mataupu lenei, o le lua vaiaso talu ai na ta’ua mai ai foi le isi gasegase na alu ane i le ED i le falemai i Kalaiesetete mulimuli ai toe foi i lona aiga, ma ina ua toe alu ane o lea na maliu ai i le aso na sosoo ai.

Ua toe faamanatu mai ai la le tina foi faapea lea na maliu i Middlemore i Aukilani e lei mamao atu, e ui o loo ioe le falemai i Kalaiesetete o lea na umi le taimi e faatali ai se fomai i le aso na alu ane ai lē ua maliu, e le o mafai ona faamautinoa poo le mea o lea na toe foi e lei vaaia se fomai poo le mea o lea na vaai, ona tea lea i tua ae toe foi ane ai mulimuli ma maliu ai loa.

O nei lipoti faanoanoa ua matuai moomia ai lava i se taimi vave le faia o se faatatau i Emergency Departments uma i totonu o Niu Sila, a o sau ai pea tala e mafua ona o le toagaogao o le aufaigaluega pe a faatusa i le toatele o tagata mamai e sulu atu i falemai.