Ua moomia le taulai o le malo i aiga o loo iai tagata faigaluega.
A o fai mai ai le Palemia fou o Niu Sila Chris Hipkins ananafi o le a ave lana faamuamua i le tau o le soifuaga o loo iai nei, ua fofola mai ai ma le manaoga o budgeting services.
Ua molimau le Papakura Budgeting Services o lea o loo fesoasoani i tagata e le tatau ona fesoasoani iai, ma o tagata nei e lua galuega peitai e le o mafai lava ona tausi ai aiga po ua leai lava tupe faasili e faatafafao ai fanau ae ua na o pili.
I auaunaga a i latou nei ua maua ai o le tau o meaai o loo toe alu ai le tele o tupe maua a tagata faigaluega.
O le Consumer Price Index poo le fua o loo fua ai le inflation o loo sau ai, o le tau o fale ua iai le siitaga tele e pei ona faamauina le alu i luga i le 4.4% o le tau o fale mautotogi poo rents ae 14% ua alu ai i luga le tau e fau ai le fale.
O le inflation foi poo le taugata o le soifuaga faatusa i le sau i lalo o le malosiaga o le tupe, o loo fesoasoani iai le tau o meaai e iai fualaau faisua ma aano o manufasi.
E ui foi i le sau o le tala o loo tumau le inflation i le 7.2% ananafi, mai le taitai o le National Christopher Luxon, ua matuai leai lava se mea o taugofie.
