O le tapuaiga a le atunuu o se vaega tāua lea i le masii atu o le ausiisii u’amea mamafa a Samoa i le taamilosaga o lea taaloga a atunuu o Malo o le Taupulega o loo faagasolo i le atunuu o Initia i le vaiaso nei, ma e faapitoa i le vaega o le ausiisii i le aumatutua poo seniors ma le vaega laiti poo juniors.
O le Aso Gafua o le vaiaso nei na tuua ai le atunuu e le ausiisii e toalua tamaitai ma alii e toalima.
O i latou ia e aofia ai le tamaitai o Lesila Fiapule ma Iuniarra Sipaia o le a tausinio i le vaega o le sii e 87 kilokalama.
O Lesila e 3 pine auro na manumalo ai i taaloga laiti a le Pasefika sa faia i Saipani i le tausaga na tea nei, ae o Iuniarra e tasi lana pine auro na manumalo ai.
O alii ua aofia ai Don Opeloge sa pine auro i taaloga a malo o le taupulega, o Vaipapa Nevo sa pine siliva ai, o le alii o John Tafi o le a sii i le vaega o le 73 kilokalama, o Maeu Nanai Livi sa pine auro i taaloga a tupulaga talavou o Malo o le Taupulega o le a sii i le vaega o le 96 kilokalama, ma Sanele Mao o le a sii i le mamafa e 109 kilokalama.
O le taamilosaga i Initia o se tasi o tausinioga o le a saili ai ni avanoa o tagata siisii mai atunuu o Malo o le Taupulega o loo tauva ai, mo taaloga a le Olimipeka o loo sosoo ai nei.
