Ua maua le iuga o le faigapalota a Fiti, ma mo le uluai taimi talu mai le 2014 ua le mafai ai nei e Frank Bainimarama ma lana Fiji First Party ona nofoia le tele o nofoa o le maota.
Mai le 55 nofoa o le palemene, na o le 26 lea na maua e Bainimarama ma lana pati, o le People’s Alliance Party e 21, National Federation Party e 5, ma le Social Democratic Party e 3.
Ua moomia ai le osi o se coalition poo se maliega e tuufaatasia ai le Fiji First Party ma se isi pati ina ia maua ai le fuainumera e faatumauina ai pea lona malosiaga.
Peitai a o lei faia le faigapalota tele a Fiti, o le isi lua – People’s Alliance ma le National Federation ua uma ona fai le la faaipoipoga ma ua tau fai tutusa ai nei ma Bainimarama i le ta’i 26 nofoa.
Ua kingmaker ai nei le Social Democratic ma na faaalia e lona taitai i le taeao nei, o loo ia vaavaai uma i itu e lua.
I lipoti mai Fiti, e le o faatopetopea le faaiuga a le king-maker, ma e le o se mataupu faigofie ona e iai nisi o taitai e le lelei lo latou va.
