A o iai pea le avanoa e lesitala ai tagata mo le lola palota a le itumalo palota o Vaimauga 3 lea e tapunia lē tumau i le Aso Faraile nei le aso 3 o Aperila, o le ogatotonu o lenei vaiaso i le Aso Lulu na momoli atu ai se tasi o sui tauva mo le palota laitiiti a lea itumalo i le vaega e puipuia aiā tatau a tagata.
O le tofa Tuuamaalii poo le afioga Tupuola Foma’i Faaniniva Sapolu o le sui faaolioli lea ua momoli i le vaega faaupufai e puipuia aiā tatau a tagata e pei ona faailoa foi i luga o upega tafa’ilagi a lea patī faaupufai le ata o lea tamalii o se sui tauva mo le palota laitiiti a Vaimauga 3.
Le fetalaiga Pupualii Kalepo sa fai ma sui o le itu lagolago a le patī e puipuia aiā tatau a tagata mai le itumalo palota o Vaimauga 3 i le momoliina o le latou sui tauva.
O se vaega o le saunoaga a le ta’ita’i o le vaega e puipuia aiā tatau a tagata le susuga Tuilaepa Lupesoliai Sailele Malielegaoi, i le momoliina atu o le tofa Tuuamaalii Tupuola Foma’i Faaniniva Sapolu.
E pei ona silafia o le sui tauva mautinoa o le vaega faaupufai o le Faatuatua i le Atua Samoa ua Tasi mo le palota laitiiti a Vaimauga 3 o le afioga Taioaliiseu Fiti Aimaasu, sa tauaveina le tofi o le itumalo peita’i ua faamavae ma le vaega e puipuia aiā tatau a tagata ma lagolago i le itu faaupufai o loo tumalo, o le māfua’aga lea o le avanoa o le nofoa o Vaimauga 3, e tusa o aiaiga o tulafono tumau a le Palemene ma le tulafono o faigāpalota, lea ua māfua ai ona toe faia le filifiliga a Vaimauga 3.
