O le amataga o lenei vaiaso i le Aso Gafua ua momoli atu ai le sui faipule filifilia o le itumalo faapalota o Gagaifomauga Numera 2, i le vaega faaupufai o le Faatuatua i le Atua Samoa ua Tasi.
O le amataga o lenei vaiaso na to’ai taunuu ai i Upolu nisi o matai ma sui o le itumalo, e sauni ai mo lea faamoemoe tāua. O le sui na filifilia mai i le mae’a o le palota laititi a lea itumalo le afioga Fo’isala Lilo Ioane sa tauva tuto’atasi peitai sa ia faailoa a o lumanai lea faiga filifiliga a faamanuiaina o le a lagolago i le itu faaupufai ua tu i le foe o le pulegamalo.
O le Maota o Samoa i Vaitele le nofoaga o loo tapuvae tasi iai polokalame faavaega faaupufai a le Faatuatua i le Atua Samoa ua Tasi o loo faatino ai fesaga’iga a faauluululuga o le pati faaupufai ma sui o le itumalo. Ua umia nei e le itu a le faigamalo nofoa e 32 o nofoa e 54 o le Palemene ae 22 nofoa o loo umia e le vaega e puipuia aiātatau a tagata. Ua tolu nofoa o sui faaopoopo o tamaitai i le Palemene ae 51 nofoa o itumalo faapalota ona maua ai lea o le aofaiga e 54.
O le tauaofiaga a le Fono Aoao Faitulafono i le Aso Lua o lenei vaiaso e faatauto ai ma le faipule filifilia o Gagaifomauga Numera 2.
