O le Ofisa Sili o le pulega o le Matāgaluega a le Palemia ma o le Failautusi a le Kapeneta le tofa Agafili Tomaimano Shem Leo na fai ma sui o le malo e feiloa’i atu i ta’ita’i o le Ekalesia a Iesu Keriso o le Au Paia o Aso e Gata Ai i Samoa, e momoli iai faamaisega tusitusia mai le malo aemaise o se fe’au faamāfanafana ona o le tuumalo o le Pelesetene aoao o lea Ekalesia i se vaiaso e le’i mamao atu, ma ua mae’a foi ona toe sauniga.
O sui o le ekalesia i Samoa e pei ona faailoa i auala o fesoota’iga a le ofisa sooupu a le malo na taliaina le oo atu o le sui o le malo ma le fe’au faamaise ma faamafanafanaga sa pine i le pale fugalaau o le faailoga o le loto faavauvau ona o le tuua o le malo e le ta’ita’i o lea ekalesia i le lalolagi, e pei ona sa asiasi mai i Samoa i le lima tausaga talu ai.
