Ua faailoa e le afioga Luamanuvao Katalaina Sapolu, i luma o le faamasinoga o ia o le tuafafine e toatasi o lona tuagane sa avea ma Faamasino Sili, le afioga Patu Tiavaasu’e Falefatu Maka Sapolu.

O ia foi sa tapenaina le uili i le faatonuga a lona tuagane, a o faataotolia i lona gasegase i le falemai i Motootua, ma sii atu ai i Niu Sila mo togafitiga ia Setema o le tausaga e 2020.

O lana molimau tusitusia sa ia faitau i luma o le faamasinoga, na ia faailoa ai foi, o ia lava sa tapa atu iai Patu Falefatu i le faia o nisi o ana uili, a o soifua lo latou tuaa tina ina ua taliu mai i Samoa ua faamanuiaina ana aoaoga faaloia.

O tuua’iga a Iliganoa Daphne Sapolu le ava faaipoipo lona lua a lona tuagane, e lei manao lona tuagane e fai se uili, sa ia matua teena e le sa’o.

Na faamatala e le molimau, o lona tuagane na te silafia ma malamalama lelei iai, o se tagata e li’oli’o i aseta ma ana meatotino o le mafuaaga foi lea sa manao ai na te tapenaina lana uili, ina ia vaevae ai tupe ma meatotino a lona tuagane a eo lei maliu. 

O le aso 25 o Setema o le tausaga 2020 na faailoa e Luamanuvao Katalaina i le faamasinoga, o le aso lea sa tapena ai lona tuagane ma lona toalua e siimai i Niu Sila o le aso foi lea na saini ai i lana uili i le potu sa taofia ai i le maota gasegase i Motootua, a o lei malaga ese ma Samoa.

O le aso lea i se taimi o le taeao a o agai le ava faaipoipo a lona tuagane ma se tasi o teine faigaluega e tala siaki e lua na saini e lona tuagane mo o la pasese ma le tupe e faaalu i le la malaga poo le pocket money, na saini ai loa le uili, ae molimau ai se tasi o teine Fiti faigaluega, ma se tasi o taulealea o le aiga o Patu Falefatu sa o la sainia foi le uili e avea o molimau.

Na toe taliu mai le siiga gasegase i Samoa i le masina o Mati o le tausaga na tea nei 2021, ma faamanatu ai e le tuafafine le uili i lona tuagane ma faailoa ai e Katalaina o le tala a lona tuagane e taatia ai pea ia te ia.

O le vaevaeina o meatotino ma aseta a Patu Falefatu ua faamauina i le uili e pei ona faailoa e lona tuafafine i lana molimau, o le fanua e 3 ma le afa eka i Aleisa, e ave le lua eka i alo poo le fanau a lona tuagane i lona toalua faaiopoipo muamua, ae o le isi eka ma le afa e ave i le uso vaetama o lona tuagane o le atalii o se tasi o ona uso, o ia lea o Maka Sapolu.

O nisi o fanua ma fale e ave mo Iliganoa Sapolu, ae o le fale fou ua mae’a ona fausia i Vaoala ini tausaga e lei mamao atu, e vaelua tutusa ai Iliganoa ma Maka.

O le vaevaeina o tupe, o le 2 vae 3 e maua e Iliganoa, ae o le tasi vaetolu e maua e Maka. O se tasi o tamaitai Fiti Initia e suafa ia Usher e na te maua le 30 afe tala.

Sa faatulaga e 3 aso o lenei faamasinoga peitai o le Aso Tofi o lenei vaiaso ua toe faaauau ai, lea o le a faamae’a ai molimau a le ofisa o Tausi Mavaega lea o loo tuuaia i le faamauina o le uili, ma fesiligia ai foi e le loia a le itu tagi le molimau a Luamanuvao Katalaina Sapolu ma isi molimau mo le Ofisa Tausi Mavaega.

O loo fuafua foi lea ofisa o le Malo o loo faamauina uili, e valaau se tagata poto faapitoa i le faia o saini mo lana molimau.