O tausaga e tele o galue ma tautua ile Mālō, sosoo ai ma le 21 tausaga o avea ma sui faipule o le Palemene le susuga Tapunuu Papalii Niko Lee Hang, o lona sao taua lea ile atiina a’e o Samoa ma ona tagata.
Na faailoa lea tautua matavela a le sui faipule o Vaimauga numera 3, ina ua molimau le afioga ile sui Palemia, le afioga Tuala Tevaga Iosefo Ponifasio, ile molimau a le Mālō i toe sauniga o le afioga ile sui faipule sa faia ile malumalu o le ekalesia o le Harvest Center i Apia lea sa faatumulia i paia faalemalo mai lava ile afioga ile Ao o le malo ma lana masiofo, o le sui o le fono a sui tofia ma lona faletua, fofoga fetalai,le taitai ma le sui taitai o le itu agai, ma sui usufono o le Fono Aoao faitulafono.
O toe sauniga faalemalo mo le faipule o Vaimauga numera 3 na ufi ai lona Sā poo se pusamaliu ile tagavai o le Malo tutoatasi o Samoa o se faaaloalo maualuga faalemalo ma tauave foi e le vasega o Malu o le Mālō poo leoleo lona Sā amata atu ile sauniga ile malumalu e oo i lona tuugamau.
O se vaega ole molimau a le Malo na saunia e le sui Palemia afioga Tuala Tevaga Iosefo Ponifasio. E tuumalo le afioga ile faipule i a Tapunuu Papalii niko Lee Hang ua 68 tausaga o lona soifua. O ia ose tasi o sui o le faafaletui o faipule o le vaega faaupufai e puipuia aia tatau a tagata.
O ona toe sauniga sa molimau ai foi le taitai o lana pati faaupufai le susuga Tuilaepa L Sailele Malielegaoi, ma saafi ile taua o le tautua a lea tamalii o se tagata a’oa’oina i ona faailoga sa ia faaaoga e tautua ai le Mālō ma le atunuu, ao avea ma faipule ma Minisita o le kapeneta i faigamalo ua mavae a le vaega e Puipuia Aia Tatau a tagata.
