E ono faasalaina i le 15 tausaga i le falepuipui se alii talavou mai Sini ina ua mae’a ona molia i moliaga tau faatupu faalavelave, terrorism offences.
Na feta’ua’ina e leoleo o lea talavou e 16 tausaga le matua, sa iai ana fuafuaga e faatino ni gaioiga faatupu faalavelave i le mae’a ona ia vaavaai i nisi o faamaumauga sa ia mauaina i luga o lana komepiuta.
Fai mai le 9News o le tausaga na te’a nei na amata su’esu’e ai e leoleo ma sa’ilia ai ma se fale i le itu i Sisifo o Sini ma maua atu iai se gel blaster ma se naifi faamoe.
Na pu’eina ai i le taimi lea alii ma molia i le umia o ia ‘au’upega atoa ai ma se fana ae na toe tatala i tua.
O le toe maua ai o isi faamaumauga fou ia e pei ona ulua’i ta’ua, ua toe pu’eina ai loa ma taofia e leoleo ma faia iai isi moliaga faaopoopo.
O le asō e tula’i ai i le faamasinoga o tamaiti i Niu Sa Uelese.
Puna o Faamatalaga: https://www.9news.com.au/national/sydney-boy-charged-alleged-terrorism-offences/88004797-f301-46b8-a555-554ada4761ab
