E 42 tausaga le matua o Zukai He, o se alii Saina ua molia nei i le tulafono i lona aumai faananā ai o ni fualaau faasāina o le ‘aisa i totonu o le atunuu, o lona umia ai o lenei fualaau faasāina ma le fuafuaga e tufatufaina atu i tua.
O se alii na faamauina lona ulufale faasolitulafono i totonu o Amerika i le tausaga 2017.
I lipoti o loo masalomia e leoleo ma auaunaga o loo galulue e taofia nei faiga faasolitulafono, o Zukai e faauluulu iai se faatinoga tele faavaomalo i le tufatufaina atu o fualaau ma pauta faasāina –international drug trafficking operation e faaaogā ai meli poo faamomoli faaneionapo (fraudulent virtual mailbox service).
Ua faamauina e faaaogā e lenei tagata ni faaamaumauga na ia ave faagaoi (stolen identity)
I talaaga o lenei matāupu, o le masina o Ianuari o le tausaga 2024 na māua ai e 2 ni faamomoli poo parcels e 3 kilokalama le mamafa o le meth na faasalāvei e leoleo, o pauta faasāina na fuafua mo Niu Sila nei.
Ta’ua na nanā ia pauta i totonu o se masini o le heat transfer stamping machine ma le 3D printer.
O le masina o Me o le tausaga 2024, e 4 nisi o faamomoli na maua, e silia ma le 1 kilokalama le mamafa o pusa na taofia i Arizona, ma le isi o pusa e lima ai na maua mulimuli ane.
E 10 kilokalama le aofaiga o le mamafa o pauta faasāina o le methamphetamine na taofia e leoleo Amerika.
I lipoti ua ta’ua ai na faatino se sa’iliga a leoleo i le fale a lenei alii i Kalefonia Amerika i le masina o Setema o le tausaga 2024, na maua ai e leoleo;
- 14 telefoni fe’avea’i
- 2 ni masina komepiuta (laptops)
- 25 ni fuafuaga tau pisinisi (point-of-sale systems)
- silia ma le 6 kilokalama o ni isi ituaiga pauta, masalomia o le ‘aisa
- silia ma le $13,000 le tupe ma;
- faamaumauga e iai sootaga i ni kamupani e 9 (shell companies) i nisi o setete, o nisi o loo faaaogā ni faamaumauga na ave faagaoi.
O loo taofia pea lea tagatānuu Saina i lalo o le vaavaaiga a leoleo, ma i faamaumauga, e ono feagai lea alii ma le faasalaga e oo atu i le 40 tausaga i le falepuipui pe afai ae faamaonia uma ona moliaga.
Ua faamanino mai, o lea galuega tele o se tasi o galuega faatino ua ta’ua o le Operation Take Back America – o galuega a le malo tele o loo aga’i tonu i le tele o gaioiga faasolitulafono tau femalaga’iga o vaega ua ta’ua o cartels, ma soligatulafono e faatino i itu tuaoi o le atunuu.
