Ua taofia nei i le vaaiga a leoleo mo su’esu’ega atili ni tagata se to’atolu lea ua molia i ni solitulafono e fesoota’i i le 10 kilokalama o le nakoti o le aisa lea na maua i sa’ili’iliga a le ofisa o le tiute ma le vaega o ta’ifau sosogi a leoleo i le afiafi o le Aso Lulu o le vaiaso nei.
O le to’atolu ua molia ma taofia e aofia ai se tamā faipisinisi ua 70 ma ona tupu tausaga o lona soifua, ae o le isi to’alua o ni tagata faigaluega i le pisinisi a le tamā matua, ma o se alii ma se tamaitai e lē o faailoaina o la tausaga o le matutua.
E lē o faailoaina foi e leoleo suafa ma le pisinisi, peitai o Lotopa o loo iai le faleoloa e ana le atigipusa uga poo se plastic container na maua o fafao ai aisa.
I le feiloa’iga a le Komesina o leoleo ma nisi o tusitala sa faailoa ai e le tofa Auapaau Logoitino Filipo, o le container na maua iai ia nakoti sa aumai mai Amerika, ma o loo faasolo pea su’esu’ega pe iai ma nisi tagata e aafia i le aumaia o ia aisa poo le methamptamine.
I le feiloa’iga lava a le Komesina ma tusitala i le Aso Tofi na ia faailoa ai, e iai ni afifi o le aisa na lafo mai Hawaii aga’i i Amerika Samoa i se taimi e le’i mamao atu, ae o ia afifi o lea nakoti sa faamoemoe e aumai i Samoa.
Na taofia e leoleo i Tutuila ma lē oo mai ai i lo tatou atunuu, ae ua faaalia e le Komesina ia Auapaau ua ave le talosaga i leoleo o le teritori a toe iai se tulaga faapea i ni meli o le aisa e taunuu atu ae faamoemoe e aumai i Apia, ia faaauau pea ona faataunuu le oo mai ina ia iloa ai tagata tonu o loo faamoemoe e ave iai.
