Ua taofia e leoleo se alii talavou 17 tausaga le matua i sona sootaga ma le mū na tulai mai i le pamu penisini i Saanapu i le vaiaso na tea nei.

O ni ata pupuu mai mea pueata poo security cameras videos footage na vaaia ai se loli pa’epa’e o loo paka i se tasi o pamu penisini ao taumafai le tagata faigaluega o lea pamu penisini e utu le fagupa’u.

O se gaioiga a lea alii talavou i tua o le loli na tulai mai ai loa se mū. Na tali atu le Ofisa o Pulega o Tineimū ma faatautaia loa suesuega i le faaiuga o le vaiaso.

Taua e le Sui Komesina o Leoleo Auapaau Logoitino Filipo ua molia nei lea alii talavou i le faaleagaina o meatotino ma o le a nofo taofia pea seia oo i le Aso 15 o Mati e tulai ai luma o le faamasinoga.