E 45 tausaga o se alii e iai ni ona tofiga i se faalapotopotoga faaleekalesia, e iai ona lālā i Niu Sila, Ausetalia, Samoa ma Fiti, na loka mai e leoleo ananafi ma ua molia i moliaga o faigāaiga faasolitulafono.
O le aoauli ananafi na faatulaga e tula’i ai lenei alii i le Faamasinoga Faaitumalo i Kalaiesetete, e tali i ona moliaga o sootaga i faigāaiga faasolitulafono, o faaoogalima matagā, faiaiga faamalosi, ma le taumafai e titina se tasi.
Na ta’ua e le leoleo satini sinia Colin Baillie, ua faia le gaioiga a leoleo e loka mai lea alii ananafi, ina ua maua le tele o lipoti o tuua’iga i nei gaioiga faasolitulafono na ia faia.
Fai mai Baillie, e talitonu e iai ma nisi tuua’iga o lea e latou te le’i iloa, ma e matuā faamalosiau atu ai ia i latou na aafia ma sao mai soligatulafono a lenei alii ina ia aga’i mai e talanoa i leoleo pe a manana’o ai.
Fai mai Baillie, e tāua le faaleo mai o ou lagona, ma o le a matou feutaga’i ma oe i se tulaga faaaloalo.
Ta’ua e Baillie, ua matuā faapitoa le toleniina o le aufaigaluega a leoleo o loo galulue i matāupu nei o nai tagata ua faileagaina.
O loo talosaga mai ai foi Bailllie i soo se tasi o silafia ni faamatalaga poo ni atugaluga i lenei matāupu, ina ia vili atu i leoleo i le 105 pe faaaogā le auaunaga i luga o le initaneti e lipotia ai mataupu e lē o ni faalavelave faafuase’i poo le non-emergency reporting service.
