Tusia: Maina Vai
Ua molia nei e leoleo se alii 36 tausaga le matua mai le afioaga o Safa’i i Savai’i ina ua ia fasiotia lona lava uso i le vaiaso nei.
O le faamatalaga lea na tu’uina mai e le Komesina Lagolago le Afioga ia Leiataualetaua Logoimauga Samuelu Afamasaga ina ua fesiligia e le Radio Samoa i le taeao nei.
O le ua maliu e 26 tausaga le matua o le uso laitiiti o le ua molia. O faamatalaga e faapea o i laua sa faia se inugaava malosi faaogaina ai le fagumalosi o le Rover.
O se feseeseaiga na tupu mai i le va o i laua nei na mafua ai ona faaoolima le ua maliu muamua i lona uso matua e faaoga ai se agaese. Na matapogia le uso matua, ae o le taimi na toe te’i a’e ai lea alii na ia faao’olima ai loa ise amo i lona uso laitiiti lea ua maliu.
Na faaalia e le komesina lagolago e tuga manuaga i le ulu o le ua maliu ua mafua ai le uma o lona soifua. O loo ua molia ai nei la e leoleo le uso matua 36 tausaga i le moliaga o le fasioti tagata faamoemoeina ma o loo i le vaaiga a leoleo i le taimi nei.
