Ua molia se tama’ita’i e galue o se tusitala mo le nusipepa o le Samoa Observer e māfua i se tala na ia tusia ma faasalalau i le nusipepa i le aso 20 o Fepuari o le tausaga nei, sa ta’ua ai le ave o se lapata’iga a leoleo i ni alo tama o le Palemia sa malaga i se taavale a leoleo.
O le lipoti foi lea na faailoa ai o le māfua’aga lea o le siitia atu e galue i le ofisa o leoleo i Faleata o se leoleo sinia sa vaaia le vaega o taavale afi i le ofisa autū i Apia.
O le māfua’aga lea o le tagi ua faaulu i leoloeo i le mau e sesē ma lē sa’o le tala na tusia e le tama’ita’i tusitala ma ua aafia ai le tulaga ta’uleleia o ē na ta’ua i le lipoti na faasalalau.
Ua faailoa mai e le tama’ita’i tusitala o le taeao o le Aso Lua o lenei vaiaso na loka ma taofia ai o ia i le vaaiga a leoleo mo le 2 itula, ma toe tatala ai i tua ina ua mae’a ona faia ona moliaga.
Ua ia faailoa mai foi o le aso 28 o le masina fou o Aperila e valaau ai lona moliaga i le Faamasinoga Faaitumalo.
