Ua saisai mai e leoleo ma o lea ua molia le tamā faipisinisi Aukilani na ia aumaia taavale second-hand mai Iapani e lē gata ua sui mita ae faapea ai ma pepa o taavale ua suia i se auala solitulafono.
E silia ma le 130 taavale second-hand ua toe maua nei i suesuega a le vaega o tiute ma e faapea o lea na faaseseina uma pepa na aumai ai.
E 36 tausaga o lē ua molia ma o lea na tu i luma o le Faamasinoga Faaitumalo i Waitakere ananafi.
O le masina o Aperila na amata suesue ai e le vaega o tiute lenei mataupu ina ua tāpā e le NZTA le masalomia o taavale nei ma pepa o taavale na aumai ai ma o lea na maua ai loa lē ua molia ma lana pisinisi na aumaia ma le faamoemoe e toe faatau ese atu.
Mai le sui o le vaega o tiute, e matuiā tele lenei solitulafono ona e lē gata o le a aafia ai tuaoi o le atunuu ae o tagata faatau taavale.
O pepa o taavale na faatusatusa, o export certificates ma pepa mai Iapani, ma o i na iloa ai le tele o le eseesega o faamaumauga o mita, o tausaga o taavale ma isi faamaumauga i le faaaogāina.
A o iai i luma o le tulafono, ua faamaonia e le vaega o tiute o lea o le a gafa le NZTA ma fesoota’iga ma tagata na faatau taavale lea ua molia ai le faipisinisi.
Puna o Faamatalaga: https://www.nzherald.co.nz/nz/auckland-businessman-arrested-after-second-hand-vehicles-imported-with-wound-back-odometers/5PNF7ZYGYFFLFOL37D26XFWKQI
