Ua molia le tama ua tuuaia na ia ave faamalosi nisi o tagata sa iai i le faletupe i Rotorua ananafi.

Latalata i le itula e 4 i le afiafi na tupu ai, ma o le faletupe a le BNZ i le ogatotonu o le taulaga.

Pe a ma le itula lea na taofia ai e lē ua molia tagata sa i le faletupe e aofia ai ma nisi o le aufaigaluega, ma pe a ma le toe 10 minute i le lima ae toe faasaoloto uma.

I ripoti o le mea e faafetaia ai e lei iai se isi na faamanualia, ma o lea na iai le lagolago i lea taimi mo tagata aafia.

Ta’ua e le pule sili o le faletupe i tala a le TV1, pau le lagona fiafia e lei iai se isi na afaina ai ma o loo saogalemu uma.

O le 35 tausaga ua molia e tulai i luma o le faamasinoga faaitumalo i le asō, ma e le tasi se moliaga o le ave faamalosi o loo tuuaia ai.