E na o le 17 tausaga o se tamaititi ua molia nei i le faaoo o le oti i se tamā e 43 tausaga mai Brisbane. Lipotia e le Alaata 9 a Ausetalia o le tino maliu o le tagata lea na maua atu e se tasi o le atunuu i le taeao ananafi i Newmarket Rd i Wilston i Brisbane ma pe ā ma le kilomita mai lona fale le nofoaga lea na maua atu iai.
O le tamaititi ua molia e mai le faaitu e igoa o Burpengary ma o loo taofia pea i le vaaiga a leoleo seia oo i le taimi e tulai ai i le Brisbanes Childrens Court i se aso o le a faatulaga e fofoga ai le mataupu.
O le isi foi teineititi 17 tausaga ua molia foi i le faaoolima i se malu o le malo ma ua teena le talosaga e tatala ai i tua ma o le a tulai foi i le faamasinoga i se taimi.
Ua faailoa i lipoti e foliga o lē ua maliu e aumau na o ia i lona fale ae foliga sa aafia i se vevesi a o lei uma lona soifua ma ua feta’ua’ina foi e foliga sa savali ane e agai i lona fale ae aafia ai i se vevesi.
O loo faaauau suesuega a leoleo i lenei faalavelave.
