Ua iai le tagata ua molia e leoleo i le faalavelave na feta’ua’ina ai le osofaia o se tamaitai i se nofoaga faasao i Takanini i le vaiaso talu ai.
Fai mai leoleo o le faalavelave na tupu poo le aoauli o le Aso Lulu na tea nei i le nofoaga faasao i Takanini.
O le faaiuga o le vaiaso na faia ai se suesuega i le tuatusi o le tagata lea ua molia nei ma ua ta’ua e leoleo e 41 tausaga le matua ma o le a tulai i le faamasinoga i Manukau.
Ua faailoa foi e leoleo i le latou pepa o faamatalaga o loo ua ofoina le fesoasoani i lē na aafia ina ua ia faailoa le faalavelave na tupu.
O loo faaauau suesuega a leoleo i lenei faalavelave.
