Ua mae’a faasalalau ai nei i se tulaga faalauaitele i se nusipepa i lo tatou atunuu, moliaga o faatosina solitulafono a le sui tauva o le vaega faaupufai e puipuia aiātatau a tagata na tulagalua i le aofaiga o palota na ia maua, i le palota laititi a Vaimauga 3 ua tuua’ia ai e le sui tauva o le pati faaupufai o le Faatuatua i le Atua Samoa ua Tasi, na manumalo i le faiga filifiliga na toe saili ai se sui usufono o lea itumalo i le Palemene.

O tuua’iga o le ave o tupe i tagata palota e ala i le faalauiloa a lea pati faaupufai na tuuina atu ai le 5 afe tala, ma le faamoemoe e faatosina ai tagata palota.

O lea foi ua mae’a faasalalau moliaga a le sui na manumalo le afioga Lautimiuia Uelese Vaai, faasaga i le sui na faauluina le tagi tau palota le afioga Samau Leatigagaeono Solitamalii Timani.

O tuua’iga a Lautimuia ua faailoa ai o le sui faipule o le pati e puipuia aiātatau a tagata, le tofa Lealailepule Rimoni Aiafi, na ia ave i ni tagata palota o lea itumalo ni ta’i selau tala i ni gaioiga se lua ma le faamoemoe e faatosina ai le filifiliga a ia tagata.

O le tasi o sui lagolago o lea vaega faaupufai sa avea ma faipule o le Palemene le afioga Fuimaono Atifale Te’o o loo tuuaia i lona ave o le 500 tala i ni tagata palota o le itumalo i le aso na feiloai ai ma sui o le pati ina ua momoli atu le sui tauva ua faauluina le tagi faasaga i le na manumalo.

O le mataupu lenei ua faatulaga e toe valaau i le vaiaso nei, e faamautu ai le mae’a faasalalau o moliaga a le itu tagi ma le itu ua faasaga iai lenei mataupu, ona faatulaga ai lea o se aso e suesueina ai, ma faamautu nisi tapenaga a o lei suesueina mau ua tapena iai itu auai o le faamasinoga.