E to’alua alii ua pu’e e leoleo ma molia i le maliu o se alii mai Northcote i Aukilani i le vaiaso talu ai. Na valaau ane leoleo i se fale i Ocean View Rd i le aso 16 o le masina nei ina ua maua ane ni lipoti o se faalavelave o loo tulai mai ai ma aga’i atu foi le vaega o fesoasoani faavavave e fesoasoani i lē na aafia o Kevin Patrick Hay, 50 tausaga lea na maliu ai lava i lea nofoaga e pei ona lipotia e le One News.
O le asō la ua molia e leoleo alii e to’alua, 55 ma le 56 tausaga le matutua mai Northcote lava. Na faafetaia e leoleo le fesoasoani a le aiga o lē ua maliu ia latou su’esu’ega ma o le aoauli o le asō na faatulaga e tutula’i ai i laua ia i le faamasinoga faaitumalo i North Shore.
