O nisi o tamafanau a Samoa e talenia i le pese ma le tomai o le musika sa faafiafia i le koneseti tele o le Motherland sa faia i le Apia Park Stadium i le Aso Faraile, i laua o Lesa Lani Alo ma Livingstone Efu, sa maua lo la avanoa a o lei faia le koneseti e asiasi ai ma militino faatasi ma fanau a le atunuu o loo i le vaaiga a le Toomaga mo ē Puapuagatia i le nofoaga o le Campus of Hope i Tuanaimato.

O se avanoa tāua mo i laua e feiloai atu ai i ia fanau ua sauaina ma faia ai ni a la pese e fesoasoani i mafatiaga o ia fanau.

O se avanoa foi na faasoa atu ai o la lagona i ia fanau, ma fesoasoani ai i le toe tapu’eina o o latou olaga a o iai i le vaaiga a le Toomaga mo ē Puapuagatia.

Ua iai le faamoemoe o i laua e toe fia asia le nofoaga i se taimi o i luma pe a toe malaga mai i Samoa.

I le koneseti i le Aso Faraile na amata i le aoauli o tau paolo ma faamalumalu ae oo ane i le afiafi ma faasolo i le pogisa ua toulu uaga o faamanuiaga ae sa le taofia ai le lolofi atu o le atunuu e maimoa ma faafofoga i fanau a Samoa talenia i le pese.