Ua faatonuina nei e le Minisita o Tupe a Isaraelu o Bezalel Smotrich le faia o tapenaga mo le fāoa o nofoaga sa aumau ai tagata Isaraelu i le West Bank.
O ia lea o loo vaaia ia nofoaga ma ua ia faailoa ua ia faatonuina le sauniuni o mea e mana’omia ina ia faataunuu ai le faamoemoe.
Fai mai le CNN e lē o mautinoa pe o le a umi se naunauta’iga ina ia apalai atoa le tulafono faa-Isaraelu i nofoaga ia i le West Bank ma pe iai foi se avanoa e faataunuu ai.
E lē o iai se faamatalaga mai le ofisa o le Palemia i le faatonuga lea a Smotrich peitai i le aso ananafi i se feiloa’iga a le Minisita o le va i fafo ma le ‘aufaasalalau sa ia ta’ua ai e le’i iai se faai’uga ua mautū i le mataupu lea i le fāoa poo le avea e Isaraelu o ia nofoaga ae sa faatalanoa le mataupu i le taimi a o tula’i mai Donald Trump i le tofi Peresetene i lona ulua’i taimi.
O se manatu ua faailoa ai le lē fiafia o Palesitina fai mai a latou ua amata faamaonia ane lava faamatalaga salatua sa maua e faapea o le naunauta’iga lea o Isaraelu ia fāoa nofoaga ia a o le’i oo i le 2025.
Fai mai Smotrich i le Palemene o Isaraelu o le malo o le Peresetene filifilia ua iai nei o Amerika ua maua ai lea avanoa tāua mo le malo o Isaraelu, ma e na o le pau le itu e aveesea ai le faamata’u ane o se setete o Palesitina o le apalai loa o tulafono a Isaraelu i nofoaga uma ia i Iutaia ma Samaria.
I le ulua’i taimi na peresetene ai Trump fai mai sa ia amanaia ai Ierusalema o le laumua o Isaraelu ma tulaga faaaloalogia o Isaraelu i le Golan Heights lea sa fāoa mai ia Suria i le 1967.
Puna o Faamatalaga: https://edition.cnn.com/2024/11/11/middleeast/israeli-minister-annexation-occupied-west-bank-intl/index.html
