E lima tausaga le umi o le a galulue faatasi ai le faalapotopotoga o le faasao faavaomalo le Conservation International, ma auaunaga tuma’oti tau faigāfaiva a Samoa, le Apia Fish Export Packers Limited ma le Tautai Samoa Association i le faamoemoe autū, ia mafai ona faatino auala faaletulafono faavaomalo e puipuiamalu ai ogasami faatulafonoina o Samoa faapea ma le una’ia malosi o le puipuia o le fagotaina o le tuna poo i’a i le auaiga o le atu, ‘asi’asi, apakoa ma le ga’ogo.
O ia ituaiga o i’a e pei ona silafia o loo tele ina fagotaina i upega e faaaogā i ogasami loloto ma faaaogā foi iai isi ituaiga o auala ma metotia a le ‘aufaifaiva e pu’e ma maua ai ona o le taulia, alumia ma le mana’omia e atunuu o loo latou gaosi taumafa mai le aano o le tuna.
O le māfua’aga autū lea o le maliega ua sainia e pei ona faailoa i se pepa o faamatalaga.
O se tasi o tāua o lea maliega o le faia ai lea o polokalame e saga malupuipuia ai ogasami ma ia maua ai pea lea ituaiga o i’a o le sami auā augātupulaga o le lumana’i.
