E lē o misi lava se tauvaga poo se taamilosaga o le siisii u’amea mamafa e lē o vaaia ai le maualuga o taumafaiga a alo ma tamafanau a Samoa o loo fai ma avefu’a i lea faagatama.
I nai aso ua tuana’i sa auai atu ai sui a Samoa i le taamilosaga o le 2025 Australian Open Championships i Melepone, ma na molimauina ai le mata’ina o le ‘ausiisii a Samoa i lea tauvaga.
E pei ona māua ai le tele o matāti’a na tata’e e sui taaalo.
I faamaumauga e ala i faamatalaga i luga o le itulau o upega tafa’ilagi a le faalapotopotoga siisii u’amea mamafa a le atunuu, Samoa Weightlifting Federation Inc, na faamauina ai nei matāti’a:
John Tafi – alii 71kg
Na ia faatūina se matāti’a fou i alii sinia o lenei itulagi poo le Oceania Senior Record: 137 kilokalama le mamafa i le sii malele poo le snatch.
Na ia toe faatūina ai nisi o matāt’ia e lua mulimuli ane o lenei itulagi i le faatulagaga lava e tasi o sinia – Oceania Senior Records: 170 kilokalama o le sii mālōlō le clean & jerk.
Na sola John ma le manumālō i lana vaega poo le category.
Emmanuel Ulimasao – alii 94kg
Na ia faatūina le matāti’a fou i le vaega o juniors i lenei itulagi – New Oceania Junior Record: 142 kilokalama i le sii malele.
O le tasi o alo na molimauina le mata’ina o ana taumafaiga o le tama’ita’i o Seine Stowers 17 tausaga le matua na tauvā i le vaega a tama’ita’i o le 77 kilokalama.
Faamauina e 3 matāti’a i le lalolagi i le vaega o tupulaga talavou na faatūina e lea tama’ita’i. O ia matāti’a e aofia ai:
- 107 kilokalama i le sii malele poo le snatch – ua tata’ea le matāti’a sa iai e 106 kilokalama.
- 137 kilokalama i le sii mālōlō poo le clean & jerk, e pei ona māua e 4 kilokalama le mamafa ua maualuga ai lana sii mai le mamafa sa iai e 133 kilokalama.
- sa ia ausia le tele o matāti’a i lenei itulagi ma le taupulega i tupulaga talavou faapea ma nisi o matāti’a i vaega sinia.
- e faamauina na lelei uma ana sii e 6 e pei ona faatulaga i lea tauvaga.
Jack Opeloge – alii 110kg
Na manumālō i lana vaega poo le category, ma na ia tata’ea le matāti’a o lenei itulagi i le vaega sinia poo le Oceania Senior Record i lana sii e 208 kilokalama le mamafa i lana sii mālōlō, ma ia faatūina se matāti’a o lenei itulagi e 368 kilokalama.
Sanele Mao – alii110+kg
Na toe tata’e lava e ia lana matāti’a o le taupulega Commonwealth Record i lana sii e 182 kilokalama i le sii malele poo le snatch.
Faaalia foi lona faatū ai o se matāti’a o le New Oceania Record ma na manumālō foi o ia i lana taaloga.
June Sipaia – tama’ita’i86+kg
- Na ia faatūina se matāti’a fou o lenei itulagi i le sii 112 kilokalama le mamafa o le snatch. E lua foi nisi matāti’a na faatūina e June, i le sii e 155 kilokalama o le clean & jerk
Manumālō foi o ia i ana taaloga.
O ni taunuuga mata’utia lea i taumafaiga a le ‘ausiisii ua faaalia ai foi le maualuga o le alu a Samoa i lenei taaloga i le tele o tauvaga.
