O le faletua ia Heather Tuigamala ua faaiuina ma le manuia lona taumafai i le faailoga o le Master of Theology i le aoga o le Ia Malamalama Agape Bible College i Aukilani NZ.

E lua i le tolu tausaga sa feagai ai lenei faletua ma le taumafaiga o lana faailoga faatasi ai ma lana tusi sa ia tusia e faatatau i le galuega a le Agaga Paia ma lana fesoasoani ia te ia a o feagai ai ma lenei mataupu.

O le faletua ia Heather Tuigamala o le lona lua ai lea o tina poo faletua ua tauaaoina le Master of Theology talu ona faavae mai le aoga lenei o le Ia Malamalama Agape Bible College i Niu Sila. 

O le Aso Toonai ua mavae na tauaaoina aloaia atu ai le faailoga lenei a le faletua ia Heather Tuigamala i se sauniga o le faauuga sa faia i le hall a Samani Pulepule i Magele.

O le susuga ia Rev Peniamina Williams ma lona faletua ia Simotu Williams na laua tuuina aloaia atu lenei faailoga faapitoa.

O Heather Tuigamala o loo galulue ma le susuga i le faafeagaiga ia Faapaia Tuigamala i le ekalesia o le Kingdom First Ministries. 

O lenei foi sauniga na faauu ai nisi o alii ma tamaitai i le tausaga muamua ia latou tusipasi, (certificates) faapea i latou e 20 i le tausaga lua i le faailoga o le Associates of Theology ma le tausaga fā e toavalu sa faauu i le faailoga o le Bachelor of Theology.  

O le tausaga muamua lenei ua tuufaatasi ai le faauuga i le va o aoga e lua i Papatoetoe ma le aoga i Mount Roskill.

Na maitauina le faatumulia o lea aso i aiga ma fanau faapea ekalesia sa auai atu e molimauina lea aso fiafia ia i latou ua faaiuina ma le manuia lo latou taumafai e ala i le faalauteleina o le poto i le Afioga a le Atua.