I le lua masina talu ai o Aperila ma Me sa tumau le tau o suauu ma penisini i lo tatou atunuu, o lenei ua tolu aso o lenei masina fou o Iuni talu ona faamamalu tau fou o lea oloa mana’omia e pei ona siitia o latou tau, o le penisini ua tutū mai nei i luga i le 3 tala 74 sene i le lita, o le suauu kiso ua 3 tala 98 sene i le lita ma le kalasini ua saofai nei i le 3 tala 53 sene i le lita.

O tau o ia oloa sa iai i le lua masina talu ai o le penisini sa 3 tala 34 sene i le lita, suauu kiso sa 3 tala 30 sene i le lita ae o le kalasini sa 2 tala 87 sene i le lita. O le sii taua o le Malo Rusia i le Malo o Ukraine ua faaalia e le tamaitai Minisita o Tupe le afioga Mulipola Anarosa Ale Molioo ua mafua ai ona faatupula’ia pea le tau o nei oloa aemaise lava i le tau o suauu e le’i faamamāina.

Ua iai nei ma popolega e pei ona faaalia e le Minisita i le tulaga o le fela’ua’iina o suauu e le’i faamamāina ma o se tulaga ua aafia uma ai atunuu o le lalolagi i le siitia pea o tau o suauu ma penisini, e faapena foi ona aafia ai atunuu o le Pasefika e aofia ai Ausetalia, ma Niu Sila.