Ua toe faamanatu mai foi e leoleo i le aufaitaavale ina ia faaeteete i le tau mafanafana lenei ina ua faamautu mai le aofai o tagata ua ma’umau soifua i faalavelave i luga o alatetele i le taimi o aso malolo lea e toa 21 na maliliu ai.
Fai mai leoleo o se tulaga faanoanoa tele lea, o le piliota mai le ta o le 4 i le afiafi o le aso 23 o Tesema na amata faamauina ai le piliota lea o aso malolo seia oo mai i le ta o le 6 i le taeao analeila.
Na saunoa le sui komesina Bruce Brien ua matuai maualuga tele lea aofaiga ma o nisi mafuaaga taatele o le tutupu mai o nei faalavelave e aofia ai le lē lava o le moe, faaaogaina o fualaau faasāina, le lē faia o fusipau, saosaoa poo le faaaogaina foi o telefoni feaveai.
O le faamanatu a leoleo e sili le malu puipuia i lo le togafitia.
