Ua mae’a faigapalota faaitumalo, ma o se palota ua matuai moomia ai ni suiga.

I le aotelega o faamaumauga mai itumalo faapalota uma ua iloa ai le pa’ū maualalo i le na o le 36% tagata agavaa na palota i le palota na faia nei.

Ia Aukilani poo le aai tele o loo toatele ai le au le palota, poo le aai toeitiiti 1.2 miliona tagata agavaa sa tatau ona palota, e na o le 31% na palota, ma o se maualalo tele lea ua iai talu mai le 2010 lea sa faamauina ai le 50.1%.

O ni faaiuga ua faatonuina ai e le Local Government New Zealand se iloiloga tutoatasi ona o le maualalo tele ua iai.

O loo tutusa ai foi finagalo o le taitai o le malo, Jacinda Ardern faapea le taitai o le National Christopher Luxon faapea le toatele o sui o le malo ua moomia se suiga e ala i le toe silasila i le faatautaiga o le palota.

Ae mai le councillor a Manukau ua toe faamanuiaina, Alf Filipaina i tala a le Herald, e moni e maualalo lava faamaumauga i palota faaitumalo, ae e lei oo i se maualalo ua iai nei ma o se faanoanoaga tele.

Ua faatu ai e Filipaina atonu ua tatau ona vaavaai i le agai e palota online mo le faafaigofie i tupulaga talavou ae faaaoga pea palota lafo i le pusameli mo le au matutua.

Ese mai i le itu a le tagata palota, o le iuga ua iai nei pe a faaaoga Aukilani ua atagia mai ai foi e lei faigofie ona maua palota mai vaega o Aukilani e le o tele se sao o local government poo pulega faaitumalo o iai.

Ripoti a le TV1 o faiga le tutusa nei o loo faatusatusa ai le maualalalo o tagata palota mai Otara i Papatoetoe lea e na o le 17 – 19%, faatusa ia Devonport, Warkworth ma Waiheke lea e silia ma le 40%.

O loo iai le faamoemoega talosia ia uma ane ona faitau palota faapitoa ua sii i luga i le 39% le maualuga o tagata agavaa na mafai ona palota.