Ua saunoa le minisita lagolago o Aoga o Jan Tinetti o le maualalo o le aofai o tamaiti e agai atu i le aoga i le kuata lua lenei o se tulaga sa talitonu e tulai mai ona o le omicron.
Ua ia faia ia faamatalaga i le mae’a ona faailoa mai o fuainumera aupito lata mai ua ta’ua ai e na o le 40pasene o tamaiti sa faaauau pea ona agai i aoga i le kuata lua o le tausaga.
O loo ta’ua foi i le lipoti lea e pei ona faailoa e le televise a Niu Sila o le toafa mai le 10 o matua sa malie lava i le misi o le aoga a le tamaititi mo se vaiaso pe sili atu foi i lea kuata.
Fai mai la le minisita e ui e faapopoleina tulaga ua faailoa mai e le lipoti lea ae sa ono foliga lelei mai pe ana faapea e le manaomia ona faanofoesea aiga ma tamaiti foi i le taimi na pepesi tele ai le omicron.
O loo tele le faatuatuaga o le minisita o loo sologa lelei nisi o taumafaiga a le matagaluega lea sa faalauiloa i le masina o Iuni.
