E maualalalo tele parking fines a Aukilani, e pei ona fai mai ai le pulenuu o Aukilani, Wayne Brown ua tatau ona sii.
O le tau o faasalaga o loo iai i le taimi nei e tusa ma le Land Transport Regulations 1999, e tusa lea ma le $12 ma i faamaumauga e tusa ma le $40 miliona i le $50 miliona i le tausaga tupe maua o loo sau mai ai.
I le silasila a Brown e le fetaui o lea e tai tutusa lava ma le tau o faasalaga o loo totogi e tagata Gore, peitai e le tutusa le tele o taavale ma le pisi o Gore pe a faatusa ia Aukilani ma e le gata ua manao ai le pulenuu e sii le tau o faasalaga o paka o taavale ae ia tuu atu i le Auckland Council le malosiaga e mafai ai ona ia faia le faaiuga o fines poo faasalaga tupe nei.
Ua fai mai ai ma Brown e tatau ona tai $100 e faatusa ia Ausetalia.
E ese mai faasalaga e totogi mo pakaga sese a avetaavale, ua faatalosagaina foi e Brown le tatau ona faaopoopo ma le faasalaga tupe o loo totogi e tagata e paka sese i mobility park e aunoa ma se pemita.
Fai mai Brown, e leai ma sona lagona alofa i tagata nei e paka sese a latou taavale.
