O lea ua tatala le avanoa mo le multiple visa mo le tolu tausaga, e mafai ai ona feoai mai i le va o malo e lua e aunoa ma le toe talosagaina o se visa asiasi mo ni taimi pupuu, aemaise mo i latou nei o loo faigamalaga soo (frequent travellers) i ni mataupu talafeagai.
Na saunoa le afioga i le minisita o mataupu tau tagata Pasefika, afioga Aupito Su’a W Sio i lana faatalanoaga i luga o le Radio Samoa i le Aso Faraile talu ai, o lea ua faalauiloa e le minisita o femalagaa’iga le suiga fou ua iai nei mo i latou e faimalaga mai Samoa, ma isi atumotu o le Pasefika e aofia ai ma Kilipati.
Saunoa Aupito, o le masina o Aokuso talu ai na feiloai ai sui o malo e lua ma talosagaina ai e Samoa le visa e faafaigofie ai ona faimalaga mai i Niu Sila sui o le malo, e pei o le Ao o le Malo, le Palemia, o faauluuluga o matagaluega, aemaise foi le aufaipisinisi ina ia faigofie ai a latou feoaiga.
Saunoa Aupito, o le popolega o Niu Sila i le soona faafaigofie ona faamatuu atu visa faimalaga, ona o le avanoa e ono oo mai ai nei tagata ma overstay ai i Niu Sila. Peitai na faamanino e Su’a, e le tupu se mea faapena ia i latou nei e pei o le Ao o le Malo, le Palemia ma isi, auā e toe foi lava latou i Samoa e faaauau o latou tofiga ma tiute, pau le itu e feoai mai ai ona o ni faamoemoe faalemalo.
O le isi popolega o Niu Sila, ua iai tagata mai isi atunuu aemaise lava i latou o loo feoai solo i ni gaioiga faasolitulafono, ae ua faigofie ona maua o latou sitiseni i atunuu o le Pasefika, ma e tatau ai ona mata’itu lelei e le matagaluega o femalagaa’iga ituaiga tagata nei, ne’i faaaogā o latou sitiseni mai se atunuu o le Pasefika e pei o Samoa, e faigofie ai ona sao mai i totonu o Niu Sila.
O se tala lelei lenei mo i latou o loo tele taimi o le tausaga e feoai ai, peitai e pei ona saunoa Aupito, o loo faagasolo pea isi fetuutuuna’iga a le matagaluega o femalagaa’iga a Niu Sila, ina ia faafaigofie atili nisi auala mo femalagaa’iga mai a lo tatou atunuu i Niu Sila nei, ae na pau lea o le visa lea ua mautinoa mai mo le taimi nei.
