O se tasi o tala mai le auaunaga a le soifua maloloina, o lea ua maua nei le tuipuipui mo le faama’i flu, lea ua maua i falemai faaitumalo uma i Samoa faapea le maota gasegase i Motootua.
Ua faailoa e le matagaluega ua ave le faamuamua ia i latou e ogaoga aafiaga pe a maua i le flu, e pei o fanauiti e iai isi ma’i e aafia ai, o tina ma’itaga, o tagata e iai gasegase tumau faapea tagata matutua.
Ua faia lea fuafuaga ona o le utiuti o tuipuipui o loo iai.
O lea tuipuipui ua faailoa e le matagaluega o le soifua maloloina lona saogalemu ma ua faamautu lea saogalemu e le faalapotopotoga o le soifua maloloina o le lalolagi le World Health Organization poo le WHO.
O āuga ma foliga vaaia o le flu e aofia ai le fiva, tiga le faa’ī, tafe le isu, tale, vaivai ma pepē tino.
O ona aafiaga ogaoga o le maua i le nimonia, ma taofia loa i le falemai mo togafitiga.
O le taimi muamua lenei ua faailoa ai le maua o le tuipuipui o le flu ma fautuaina ai le atunuu i le tāua o lea puipuiga faalesoifua maloloina.
