Ua maua lelei se tasi alii sa fuafua e faimalaga mai le isi setete i le isi ma se vaegatupe tele e $300 afe fai mai leoleo o tupe palapalā ma sa feaveai mai i lana ato na alu ma ia i luga o le vaalele.

Fai mai leoleo o le tagata lea mai Sini sa fuafua e faimalaga atu i Perth i le Aso Lua o le vaiaso nei ae maua ai lana uta lea o tupe ina ua sailia i masini suesue i le malaevaalele e tolu lelei taga pepa iila ua teuina ai tupe i lana atopau carryon sa alu ma ia i luga o le vaalele ma toe maua foi le isi vaega tupe e silia ma le $6,400 i lana tamai ato.

O lenei alii e 29 tausaga le matua, na pueina e leoleo ma ua feta’ua’ina o loo musu e faailoa ni faamatalaga e tusa o lana faigamalaga faapea foi ma lona tuatusi aemaise o le vaegatupe tele sa fealuai ane ma ia.

Ua molia nei i le mataupu lea ina ua masalomia o tupe sa ia feaveaiina e aumai mai ni faiga faasolitulafono ma o se solitulafono foi e ono oo atu i le tolu tausaga e falepuipui ai pe a faamaonia.

Na ave foi e leoleo ma telefoni feaveai e lua a lenei alii ma le tablet e faia iai suesuega. Ua fuafua e tulai i le faamasinoga i Perth i le masina o Iuni a o faaauau ai pea suesuega.