Ua maua le siama o le listeria i kiwifruits a Niu Sila o loo auina atu i le malo tele o Amerika, ma o lea ua toe valaau ai e aua ne’i taumafaina.
O suesuega na faia i le aso 7 o Iulai a le matagaluega o le soifua maloloina i Kentucky na faamaonia ai ua afaina i le siama kiwifruit a le Zespri, poo le kamupani Niu Sila o loo lauiloa i le faatauina atu i maketi i fafo.
Fai mai ai le Zespri, ua iloa e na o le lua faatoaga na sau mai ai kiwifruit ua faaleagaina ma o nuu foi nei na tau mai ai e lei aumaia mai nuu na aafia i lologa.
Ua taofia lē tumau ai i le taimi nei kiwifruit mai faatoaga nei i Niu Sila ma e tusa lea ma le 3,380 trays o kiwifruit ua aafia ai.
Mai Amerika e leai se isi ua ma’i ai e oo mai i le taimi na tuufaatasia ai tala fou, ae i le Zespri i Niu Sila o loo faatalitali nei le faaiuga o le recall ua faia i Amerika faapea suesuega e iloa ai poo fea tonu lea na aafia ai kiwifruit i le siama.
