Ua faailoa e leoleo o le osofaia o se fale i Aukilani na maua atu iai se vaega tele o le fualaau faasāina o le aisa e silia ma le miliona lona tau.
O le alii leoleo suesue o Lloyd Schmid ua ia faailoa i le One news a o faia sa latou suesuega i se fale i Magele i le vaiaso talu ai, ona o se vaega o le suesuega o se faalavelave feta’ua’ina ai se fana i le masina talu ai, na maua ai ma le 4 kilo o le aisa atoa ma isi fualaau faasāina ma le toeitiiti 8 afe o le tupe na maua ai i lea fale.
O le tagata ua pueina e leoleo o se sui o le Comanchero e 34 tausaga le matua ma ua feagai nei ma moliaga o le umia ma le sapalaia o fualaau faasāina e pei o le aisa, methamphetamine, amphetamine ma le mariuana.
