Ua faamaoina mai nei le maua ai o le to’atasi i le faama’i o le misela i Aukilani nei, ma ua faamauina ai le tuuina mai o fautuaga a le Auaunaga o le Soifua Mālōlōina.
I lipoti mai le Radio NZ, e to’atasi ua aafia ma e faamauina o se tasi o sui o le ‘auvaa o le va’a la’upasese a le Fullers360.
Ta’ua o lenei tagata ua faato’ā toe foi mai i sana malaga i le Atu Asia.
Ma i le alia’e ai o lenei matāupu, ua faailoa faalaua’itele mai ai e le Soifua Mālōlōina a le atunuu, itu na aga’i iai lea tagata ua aafia, mo le silafia e tagata lautele, ina ia mautinoa le faatino ai o ni o latou siaki faalesoifua mālōlōina.
Ta’ua sa faamauina le iai o lea tagata i le faleoloa poo le Supamaketi o Woolworths i Kelston, o luga o vaa a le Fullers360, ma le nofoaga e paka ai taavale a le Customs i le taulaga i Aukilani nei.
Ua tuuina mai ai foi se fautuaga faalaua’itele, aemaise o le lapata’ia ai o tagata e māua sa iai i nofoaga ua ta’ua ina ia faia nei loa ni siaki, ma afai ua iai ni āuga ua alia’e i le maua i le faama’i o le misela, ina ia nofo lelei i le fale, a ia aua ne’i nofo latalata i ona tauaiga ina ia alofia mai le mama’i.
Ua faamanatu foi le auaunaga i le tele o le avanoa e vave aafia ai le isi tagata i le faama’i pe a o e aafia, ma e ono aafia ai lou soifua pe a lē togafitia lelei.
Ua iai foi popolega i le pa’ū maualalo ai o le numera o tagata ua fai o latou tuipuipui talu mai le vaitau o le Koviti-19 e ono vave lava ona maua ma aafia ai le atunuu i se tulaga o le sasao faaafi o le faama’i i le atunuu.
Ta’ua i lipoti le galulue ai o le Auckland Transport e mata’itūina lelei tagata femalagaa’i auā le soifua mālōlōina o tagata lautele.
Puna o Faamatalaga: https://www.rnz.co.nz/news/national/560630/new-measles-case-in-auckland-alerts-issued-over-ferries-and-supermarket
