Saunoa le Palemia Jacinda Ardern i le asō ua maua se to’a ina ua maua faamatalaga e faatatau i se ulugalii Niu Sila e iloa tele foi e tagata lea sa taofia i Iran mo ni nai masina ae ua faailoa mai ua agai ese mai nei ma Iran ma o loo manuia ma saogalemu.
O Christopher Topher Richwhite ma Bridget Thackwray ua faailoa e le televise Niu Sila e talitonuina sa taofia i Iran ma ua faamaonia e le matagaluega o le va i fafo o lea ua agai ese mai ma o loo manuia.
Sa galulue malosi ai le matagaluega o le va i fafo ma fefaatauaiga ma le malo o Niu Sila i le mataupu lea ae ina ua fesiligia le Palemia i le mafuaaga na taofia ai sa ia faailoa o isi faamatalaga uma e tatau ona maua mai i le aiga lea.
Pau le itu na faamanino e le Palemia o le saogalemu ma le toe foi manuia mai o i laua ia. Ua toe faamamafa ai e Ardern le tulaga lamatia o le faimalaga i Iran i le taimi nei ma fautuaina tagata Niu Sila ia alofia le faimalaga i lea faaitu.
