E 59 tausaga o se tagatānuu Saina ua pu’e faapagota ma ua molia nei e leoleo ma le vaega o le tiute, ina ua maua e le vaega o le tiute lona taumafai e aumai faananā i totonu o Niu Sila fuala’au faasāina e faaaogā ai se ulo faimea’ai, a o faatino ai galuega masani a le ofisa i le iloilo ai o ‘ato ma meatotino i le malaevaalele faavaomalo i Aukilani, i le faato’ā taunuu mai o le faigāmalaga na malaga mai ai lenei alii.
Na malaga mai lea alii Saina i le faigāmalaga na aga’i mai i Shanghai Saina i le aso 27 o le masina ua mavae atu.
Ma e tusa ai ma se pepa o faamatalaga mai le Ofisa o le Tiute (NZ Customs Services) na faatino le iloiloga masani.
Ta’ua na iloilo e sui o le ofisa meatotino a lenei tagata; ae na faamauina e iai lava se meatotino na iai masalosaloga a le ofisa.
O lea lava na maua ai e le tiute fualaau faasāina i totonu o le ulo faimea’ai na nanā mai ai pauta o le methamphetamine ma le isi pauta o se crystal substance.
Na taofia ai lava lea alii ma molia ai i lona aumaia i totonu o le atunuu o se fualaau faasāina o loo faatulaga i lalo o le faatulagaga Class A controlled drug; o se fualaau aupito i telē ona aafiaga.
E lipotia pe tusa ma le 3.5 kilokalama le mamafa o le pauta o le methamphetamine; poo le lata lava i le $1 miliona tālā Niu Sila lona tau pe a faatau i tua.
Ua faafetaia e le faatonu o le vaega o tiute i le malaevaalele i Aukilani sui uma o loo nafa ma galuega faatino i le taofia ai o nei faiga solitulafono o loo taumafai e faatino e aafia ai o tatou laufanua.
Puna o Faamatalaga: https://bit.ly/4ny6Hbe
