Ua faamaonia o le a mafai ona toe taalo le alii iloga i le tenisi Novak Djokovic i le Australian Open o le tausaga fou ina ua lipotia le mafai ona tuuina iai o se visa e malaga mai ai mo lea faamoemoe.
O Djokovic 35 tausaga na toe tipoti ese ma le atunuu i le amataga o le tausaga nei i Melepone ina ua taunuu mai i Ausetalia ae lei faia se tuipuipui o le koviti.
E ui e lei faia lava sona tuipuipui i le taimi nei ae ua faamaonia mai o lea ua kilia e taalo aua ua mae’a foi nisi o vavao o le koviti sa faamalosia ai lea tulaga.
Fai mai le alii taalo ua fiafia lava ua maua le avanoa e toe tausinio ai. O lona uiga la o le a faatalitalia ai ma le iuga o lenei taamilosaga pe o le a toe foi ane le Ipu ia Djokovic lea e manatu le toatele ana leai le faaletonu i lona visa semanu e toe manumalo ai foi i le tausaga lenei, peitai na manumalo ai Rafael Nadal.
