Ua maua le uluai case o le monkeypox i Niu Sila.
I lipoti na sau i tua i le Aso Toonai o le uluai case e nofo i Aukilani, 30 ma ona tupu tausaga o lona matua ma e le’i mamao atu na faato’ā taunuu ai mai se atunuu i fafo.
E to’aitiiti tagata e vavalalata sootaga ma le case faamaonia, ma ua fautuaina le mata’itu o āuga.
Mai le soifua maloloina e lē o iai se faamaoniga o le maua i tua i le komiuniti o le monkeypox.
O le maua ai o le uluai tagata ua maua i le monkeypox e lē o se tala e ono faate’ia ai e tusa ma lipoti a le matagaluega, pe a fua i le faaopoopo o tagata aafia i atunuu mamao e aofia ai ma Ausetalia.
Mai le soifua maloloina o le to’atele o tagata e maua i le monkeypox o loo mafai lava ona vaaia i le fale ma e lē to’atele ni tagata i le lalolagi ua maliliu ai.
Ae o uluai āuga o le monkeypox, o le ulu tiga, maualuga le fiva, faamaalili, tino ma maso tiga, tiga le tua, lē lavā ma vaaia fula poo patupatu i le tino.
