Ua maua le tinomaliu o le tina e suafa ia Mei Han Chong lea na iai le popolega o leoleo e pei ona lipotia atu ananafi ina ua maua atu lona toalua o Fuk Fu Joseph Kwok ua maliu i lo la fale i Ellerslie.
O le lipoti lata mai a leoleo i le mataupu lea ua faamaonia ai e toatasi le alii ua molia i le faalavelave lea.
O le tino maliu o si tina o Mei na maua i Greenheith pe ā ma le 30km le mamao ese mai lo latou fale ma na maua i le po anapo.
O loo ta’ua e leoleo e talitonuina o sia tina na faaoo foi iai e se tasi le oti.
E 67 tausaga o Mei ae o si ona toalua e 66 tausaga o le soifua.
O lē ua molia e mai Glenfield ma e lua moliaga o le fasioti tagata ua faia iai ma o le asō na faatulaga e tulai ai lea alii ua 42 tausaga le matua, i le faamasinoga faaitumalo i Aukilani.
