E 28 tausaga o se tama tane o le nuu o Lano i Savaii na maua i sailiga a leoleo ma le vaega o galuega lavea’i a le pulega o le tineimu ua maliu.
O lē ua maliu e pei ona faailoa e le komesina o leoleo i se lipoti sa alu mo sona faiva i le vaiaso na te’a nei, ae na logo e lona aiga leoleo mo se fesoasoani ina ua lē toe foi ane mai lona faiva.
O se isi o sailiga a leoleo na faatino i gataifale o le nuu o Gataivai i le lua vaiaso ua mavae, ona o se tamā e 33 tausaga na alu foi i se faiva ae e lei toe foi ane.
O sailiga na faia e lei maua ai lea tamā ma ua taofia ai ia sailiga.
O le maliliu o ia tagata e to’alua ua fautuaina ai e leoleo le atunuu aemaise o le autautai, ina ia mata’itū lelei poo saogalemu le sami a o lei alu ni faiva, ina ia faasaoina ai ola ma soifua mai ni faalavelave e tutupu i le gataifale a o feagai ma ni faiva, e lē gata o le aloalo ae o faiva i ogasami loloto.
