Ua ofo le matagaluega o leoleo, falepuipui ma le toe fuata’ina e maua le taui tupe mo se tagata e maua ai ni faamatalaga faamaoni ma faamoemoeina, ina ia fesoasoani ai i sa’iliga o le pagota sola o Lauititi Tualima lea ua savali i le lua vaiaso e le’i maua.
E lē o faailoaina e le matagaluega pe fia le taui tupe, ae ua aumai lea faasilasilaga mo le atunuu ma le lapata’iga ina ia aua lava ne’i taumafai e faafeiloa’i lea tagata nofosala o loo tau sa’ili poo fea o lafilafi ai.
O le tasi o lapata’iga tāua mo le atunuu mai leoleo, o se solitulafono lou faalafi o se pagota sola poo se tagata o loo fia maua e leoleo i ni su’esu’ega o ni tuua’iga tau soligatulafono.
Ua faaalia e le matagaluega, afai e te vaai ia Lauititi, ia logo vave se ofisa o leoleo o latalata ane.
