O se tagata Niu Sila sa lavea lana taavale a o aga’i atu mo galuega ma maliu ai lava i le aso na sosoo ai, ua faailoa i lipoti i le asō mai le 9News sa ia mānavaina se vailaau o le antifreeze, e masani ona faaaogā i radiators o taavale.
O le lipoti a le coroner i le faalavelave lea ma le su’esu’ega na faia na iloa ai lea tulaga ae o lē na aafia o se alii sa faauluulu iai le vaa o le NZ King Salmon ma o ia lea o Pryor Alan Lee 36 tausaga, na oso ese lana taavale ma le auala i Marlborough Sounds i le masina o Mati 2019 ma atoa le po o iai i lea nofoaga a o le’i savali ane aga’i i lo latou fale ma su’e se taavale e aga’i ai i le falema’i.
O le aso na sosoo ai na maliu ai lava i le falema’i e ui i galuega laveai sa faatino. O le i’uga la o su’esu’ega a le foma’i faapitoa ua iloa ai na maliu ona o le mānavaina o le ituaiga vailaau lea ma atili faigata ai i manu’aga ina ua lavea le taavale.
