Afai ae pasia le pili na faatoa talanoa e le malo ananafi, e ono manuia ai aiga e na o le toatasi le matua ma o ia foi lea o loo mauaina le penefiti ua ta’ua o le Sole parent support.

O le pili lenei afai ae pasia e le Palemene o lona uiga o le a tuu sa’o atu e le Inland Revenue tupe ua ta’ua o child support lea o loo ia aoina i lima o le matua agavaa.

I le taimi nei o lea o loo aoina e le Inland Revenue tupe nei e totogi e le matua e le o nonofo ma tausi i le tamaitiiti ma o loo toe faapaleni i le penefiti lea e tala e le matua o loo mauaina le sole parent support.

Ae afai ae aloaia lenei suiga e le gata o le a maua sa’o e le matua le child support o loo totogiina atu i le Inland Revenue ae o le a lē toe tau moomia ai foi le faatalosaga o le matua mo le child support ina ia agavaa ai i le penefiti.

Afai ae pasia e le Palemene o lona uiga o le a amata aloaia le atoaga o lenei suiga mai le masina o Aokuso o le tausaga nei pe a uma ona totogi le child support mai le masina o Iulai.