Ua maua le faigamalo fou a Fiti, ma e le o filifilia e le Social Democratic Party le vaega a lē sa tu mai i le foe mo le tele o tausaga, Frank Bainimarama.
O lea ua faia le faaiuga a le Social Democratic o le a faatasi atu i le People’s Alliance ma le National Federation Party latou te fauina le faigamalo fou, ma ua uma ai nei ma le Fiji First poo le vaega lea a Bainimarama lea ua valu tausaga sosoo o tauavea mai.
O se faaiuga ua faia i le mae’a ai o le tolu aso talu na uma le faigapalota tele a Fiti ma ua uma ai nei foi ma le 16 tausaga o pulea toatasi mai e Bainimarama polokiki a lea malo.
Ae i le va o pati e tolu ua omai faatasi, e ui o lea na kingmaker le taitai o le Social Democratic, ae o Sitiveni Rabuka o le People’s Alliance lea o le a palemia ma o le a filifilia lea i le uluai feiloaiga a le palemene i le asō.
O Rabuka e le fou i le tofi palemia, o ia foi sa palemia mai le 1992 – 1999.
