O le asō e maua ai le avanoa o le sui peresetene o Amerika e faatasi mai ai online i le fonotaga a ta’ita’i o le Pasefika poo le Pacific Islands Forum o loo faia i Fiti i le vaiaso nei.
O le maua ai o le avanoa e saunoa ai Kamala Harris i le asō, o se valaaulia a le faatonusili o le Pacific Island Forum o ia foi o le palemia o Fiti Frank Bainimarama.
O se avanoa o le a saunoa ai Kamala i fesoasoani o le a saga unaia ai faiga faapaaga a Amerika ma le Pasefika lea e aofia ai le faia o amepasa i Tonga ma Kiripati, faatoluina fesoasoani tupe mo le atina’eina o le tamaoaiga faapea le gataifale, aemaise fuafuaga fou a Amerika ma le Pasefika.
O ni fesoasoani o le a toe faafoi mai ai pisikoa mai Amerika i le Atu Pasefika, ma i molimau tusitusia mai le fale pa’epa’e ua faatupula’ia ai le sao o Amerika i le Pasefika.
A o taumafai mai pea Amerika i le Pasefika, ese mai le sui peresetene o le vaiaso nei foi e taunuu ai se tasi o sui o le vaega o le siosiomaga a le malo tele i Suva i Fiti faamoemoe e feiloai ma ta’ita’i o atunuu.
